A Biblioteca e Arquivo de Galicia acolle o relatorio Olga Gallego e a condición feminina, a cargo do presidente da fundación que leva o seu nome, Pedro López Gómez.
Esta actividade ten lugar na antesala da celebración do Día da Muller e no marco da inauguración da serie expositiva Mulleres Sobranceiras, coa que se pretende poñer en valor e dar a coñecer, a través de mostras documentais, a vida e a obra de mulleres que levaron a cabo un destacado labor en diferentes ámbitos profesionais.
A relevancia da figura de Olga Gallego Domínguez (Ourense, 1923-2010) na arquivística española, a súa preocupación constante polo desenvolvemento do sistema arquivístico e a conservación do patrimonio galego así como a doazón que a súa irmá fixo do seu arquivo persoal ao Arquivo de Galicia, no ano 2011, fana merecedora da primeira mostra desta serie de homenaxes dedicadas ás mulleres galegas.
