Quen coida de min? Quen fai o meu almorzo? Quen me leva á escola? Como é posible que a miña cama apareza “milagrosamente” feita no breve tempo no que me aseo? Como chega a comida, a luz, á miña casa? De onde sae a roupa limpa? Por que a miña familia ten tan pouco tempo para xogar comigo? Por que teño que estar tantas horas no cole, e non me queda tempo para facer outras cousas? Cantas cousas hai que facer nun día?
Para esta sesión de NEXOS INFANTIL traballaremos a conciliación desde a óptica da infancia. Xogando con dinámicas de roles descubriremos quen fai que na nosa familia, e canto fai cada quen.
Crearemos un gran horario colectivo no que deberemos conseguir repartirnos as tarefas cotiás (as persoais e as colectivas), e que nos axudará a comprender o difícil que é ter tantas responsabilidades e compaxinalas, valorando así o que fan nais e pais a diario e aprendendo a detectar tanto os desequilibrios como as asignacións de xénero que facemos sen decatarnos.
