Do 9 ao 12 de xuño a Comisión Europea organiza a primeira edición do New European Bauhaus Festival, un evento híbrido que terá actividades principais en Bruxelas e eventos paralelos en Europa e fóra dela con tres piares: o Foro, a Feira e o Fest. Os días 9 e 10 de xuño na Cidade da Cultura celébrase o New European Bauhaus Galicia, organizado pola Consellería de Sanidade e o Servizo Galego de Saúde.

O evento incluirá mesas de diálogo, unha feira e diversos obradoiros, reunindo persoas, empresas e institucións para compartir proxectos e crear sinerxías en liña cos obxectivos da New European Bauhaus. Trátase dunha ocasión festiva para gozar da natureza e compartir espazos con persoas unidas polo desexo de promover a sustentabilidade, a inclusión e a beleza.

Dúas mesas de diálogo (9 de xuño) porán en valor os catro eixos temáticos: a reconexión coa natureza e o fomento da economía circular (o longo prazo, o pensamento do ciclo de vida e a súa integración no ecosistema industrial); e a construción de pontes cara a unha verdadeira cohesión social, é dicir, a recuperación do sentido de pertenza, e o investimento nos lugares e as persoas que máis o necesitan. Ademais, o día 10 está prevista a celebracón de diversos obradoiros nos espazos verdes da Cidade da Cultura.