Letras Galegas 2019 | Antonio Fraguas na Biblioteca de Galicia

A Biblioteca de Galicia quere contribuír á conmemoración do Día das Letras Galegas 2019, este ano dedicado a Antonio Fraguas Fraguas, cunha exposición das obras custodiadas na biblioteca deste prolífico autor.

Esta mostra poderase visitar no vestíbulo de Edificio do Arquivo e Biblioteca de Galicia desde o 16 de maio ata finais de agosto. Nela trátase de ofrecer unha selección das obras máis significativas de Antonio Fraguas, artellada arredor das facetas máis coñecidas deste apaixonado do coñecemento.

A exposición tratará de achegar aos visitantes á figura de Fraguas como historiador e xeógrafo, coa presenza de obras como Geografía de Galicia, título de referencia aínda hoxe para calquera estudo sobre este tema publicada en 1953. Tamén estarán presentes algunhas das súa obras sobre a Historia de Galicia ou o Colexio de Fonseca, tema da súa tese de doutoramento.

As facetas de Fraguas como articulista, conferenciante e divulgador non poden deixar de estar reflectidas na mostra bibliográfica, xa que un dos obxectivos deste incansable estudoso da cultura galega ao longo de toda a súa vida foi o de dar a coñecer a cultura da nosa terra.

Por último, nesta exposición poderanse ver algunhas das obras máis importantes de Antonio Fraguas como etnógrafo e antropólogo.

O homenaxeado deste ano é, sen ningunha dúbida, un dos grandes nomes da antropoloxía e etnografía galegas. Os seus estudos nestes campos achégannos a todo tipo de expresións populares, desde o Entroido ata o traxe tradicional galego, e seguen a ser referencia para calquera estudo ou investigación actual sobre estes eidos.

 

 
Exposicións
 
29 AGOSTO-15 DECEMBRO
De 10 a 20 horas
29 e 30 AG | 5 e 6 SET
21 horas
19 SET - 5 XAN 2020
De 10 a 20 horas
8 NOV 2019 - 12 ABR 2020