Escena Galega, en colaboración coa tamén asociación sectorial AGEM (Asociación Galega de Empresas Musicais) organiza o martes 28 de novembro no Edificio CINC da Cidade da Cultura a 3ª Xornada de Promoción Escénica e Musical de Galicia.
Será unha xornada intensiva de 10 a 18.30h onde as entidades asociadas a ambas organizacións acudirán a un espazo profesionalizado de relación entre compañías, bandas de música, promotoras e distribuidoras e profesionais da programación escénica e musical, de espazos públicos e privados, para axudar a facilitar a labor de distribución e venda dos espectáculos e actuacións musicais, por unha banda, e de contratación dos mesmos, pola outra.
A organización destaca a participación de case un 40% máis de profesionais da programación que a pasada edición, 46 en total incluídos 7 espazos de Portugal.
A realización desta xornada é posible grazas ao apoio e colaboración da Xunta de Galicia a través da Axencia Galega das Industrias Culturais, a Cidade da Cultura e o patrocinio de Cafés Candelas.
