A Asociación Nacional de Empresas Distribuidoras de Electrodomésticos, ADEN, celebra o día 20 de outubro na Cidade da Cultura a entrega dos III Selos de Calidade Medioambiental cos que distingue a aquelas empresas asociadas e pequenos comercios que acrediten o seu labor no tratamento dos residuos, especialmente os Residuos en Aparatos Eléctricos e Electrónicos (RAEE), en liña cos obxectivos da Axenda 2030.
Dentro da política de incentivación da reciclaxe e preservación do medio ambiente preténdese establecer un sistema que permita, dunha parte, coñecer as empresas que se distinguen pola súa defensa do medioambiente e, doutra, premiar dalgunha maneira dita actitude. Estes recoñecementos e galardóns, que poderán exhibir nos seus puntos de venda, acreditan as súas boas prácticas na xestión de RAEE.
A entrega das distincións terá lugar no Edificio Fontán da Cidade da Cultura e contará coa participación de Leandro Fernández Macho, formador especializado en liderado e xestión do cambio nas organizacións e nas persoas, que impartirá a charla "SUMAS: a ciencia da actitude para avanzar". Intervirán tamén autoridades e o presidente de ADEN, Javier González Pereira.
