A Cidade da Cultura acolle o día 10 de novembro a II Xuntaza de avós e avoas educadores, unha iniciativa da Cruz Vermella dirixida a maiores de 60 anos que teñen ao seu cargo a educación dos seus netos, durante toda a xornada ou unha parte significativa da mesma.
A xuntaza servirá para recoñecer e agradecer o labor que desempeñan os avós e avoas, compartir experiencias e vivencias e gozar dunha xornada especial.
Máis de 160 avós e avoas que participaron ou están a participar na iniciativa Avós e Avoas Educadores déronse cita o ano pasado no Gaiás na primeira xuntanza organizada pola Cruz Vermella de Galicia. Os obxectivos deste programa son proporcionarlles información e recursos para abordar situacións que se lles presentan cos seus netos e netas no día a día e ofrecerlles un soporte social que tamén sirva como prevención fronte á tensión que leva a crianza e coidado dos nenos e nenas.
Na actualidade o programa desenvólvese, co apoio da Xunta de Galicia, en sete localidades galegas: A Coruña, Santiago, Ferrol, Lugo, Ourense, Pontevedra e Vigo. Desde que se puxo en marcha, no outono de 2016, máis de 300 persoas beneficiáronse das actividades deste programa, que se basea nunha metodoloxía dinámica e moi participativa.
