A Universidade da Coruña, a plataforma Educa e a iniciativa Maestros, Innovadores Alumnos Competentes (MIAC) organizan o II Congreso Mundial de Educación - EDUCA 2019, que decorrerá na Cidade da Cultura do 21 ao 23 de febreiro. O evento concíbese como un foro de intercambio de coñecemento e experiencias didácticas entre profesorado e alumnado de todas as etapas educativas e todas as materias. A Fundación Cidade da Cultura de Galicia e a Xunta de Galicia colaboran neste evento xunto co Concello de Santiago, a Universidade de Santiago de Compostela e a Universidade de Vigo, entre outras entidades públicas e privadas.
Desde a organización subliñan a importancia de favorecer sinerxias entre os docentes das diferentes etapas para mellorar a calidade educativa, ademais de coñecerse, ver como traballan os compañeiros e compañeiras, achegar ideas e establecer directrices e liñas de actuación desde a posta en común. O comité organidor está formado por profesorado de diferentes centros educativos e ámbitos do coñecemento, aspirando a converter este evento nun referente nacional e internacional.
As sesións de mañá do II Congreso Mundial de Educación - EDUCA 2019 abordarán conferencias maxistrais sobre temas de actualidade e futuro de interese para todas as persoas asistentes, mentres as xornadas de tarde quedarán reservadas para conferencias especializadas en temas específicos de cada área e etapa educativa. Tamén será a quenda para a exposición dos traballos de investigación por parte dos participantes.
Durante o congreso tamén se entregarán os Premios Educa Abanca ao Mellor Docente de España, que recoñecen a aqueles profesores e profesoras que destacan pola súa calidade docente, pola súa praxis, polo seu trato ou pola súa preocupación polo futuro do seu alumnado, entre outros méritos. Os galardóns establecen 5 categorías (Educación Infantil, Educación Primaria, Educación Secundaria/Bacharelato, Formación Profesional e Universidade) e teñen como característica principal que as candidaturas deben ser propostas polo alumnado.
Máis información sobre o II Congreso Mundial de Educación - EDUCA 2019 e inscricións na web do evento.
