Volve o Galiverso á Cidade da Cultura, onde poderás revivir todas as experiencias inmersivas desenvolvidas ata o momento nesta iniciativa para explorar virtualmente o patrimonio cultural e natural de Galicia.
Sen saír do Museo Centro Gaiás, grazas á tecnoloxía de realidade virtual, podes volver camiñar polas rúas do vello Portomarín tal como eran antes de que a antiga vila fose anegada pola construción do encoro de Belesar; ou visitar marabillas naturais, arqueolóxicas e históricas como a cova de Eirós, a praia de Teixidelo, ou a Cova do Rei Cintolo.
Dentro do Galiverso é posible viaxar virtualmente a destinos de gran valor cultural, histórico e paisaxístico como a cripta do Apóstolo na Catedral de Santiago, o canón do Sil, ou o templo romano de Santalla de Bóveda en Mera (Lugo). Pero tamén podes optar por subir nun batiscafo virtual e explorar os fondos mariños da costa galega, ou ata visitar dixitalmente os 11 centros que forman parte da Rede de Museos de Galicia.
Experiencia dixital inmersiva
Galiverso é unha iniciativa da Xunta de Galicia que emprega as tecnoloxías inmersivas e de realidade virtual co obxectivo de amosar o noso patrimonio material e inmaterial (artístico, industrial, arquitectónico, natural, etc.) dun xeito diferente.
Para acceder, cómpre reservar praza, de balde, no despacho de billetes do Museo Centro Gaiás ou a través de Ataquilla. O acceso inclúe as distintas experiencias inmersivas que puideron verse anteriormente, e en primicia, na Cidade da Cultura: Galiverso no corazón da pedra, Galiverso dos Museos, Galiverso somerxido, O vello Portomarín e O Galiverso empeza aquí.
Para entrar no Galiverso é necesario ter como mínimo 8 anos de idade e todas as nenas e nenos ata 12 anos deberán estar acompañados/as durante a experiencia dunha persoa adulta responsable.
>>>> Queres reservar praza? Preme AQUÍ.
>>>> Queres saber máis sobre o Galiverso? Preme sobre cada imaxe!
