Galiciatic celebra a súa 22 edición o día 7 de novembro de 2024 no Edificio CINC da Cidade da Cultura para analizar a evolución das TIC, facendo énfase na creación dun futuro máis próspero, equitativo e respectuoso co medio ambiente, e na mellora da sustentabilidade dos investimentos e a eficiencia operativa das organizacións.

As intelixencias artificiais e as súas incertezas en canto ao risco e a seguridade; a preocupación por dispoñer de tecnoloxías sostible; a enxeñería de plataformas; o autoservizo do software asistido pola IA; as plataformas industriais na nube; as app intelixentes; unha IA xenerativa democratizada; a forza de traballo conectada; ou os compradores automatizados (clientes máquina). Estas son algunhas das tecnoloxías e tendencias que marcan as liñas temáticas de Galiciatic 2024, contando con representantes dos sectores empresariais e con expertos específicos nas diferentes materias.

Ademais, o evento mantén as sesións de promoción do talento dixital que tiveron lugar durante as pasadas edicións de Galiciatic 2022 e 2023, contando para iso con diversos centros de FP galegos e centros de formación de posgrao en Universidades e Escolas de Negocios. As empresas interesadas en captar talento disporán de casetas informativas, como é habitual.

Tamén haberá “show rooms” físicos e virtuais, casetas físicas, promovendo o acceso dos medios de comunicación, a visualización en redes sociais, así como a presenza daqueles interesados en coñecer de primeira man innovacións das empresas.

O programa completo da xornada pode consultarse na web de Galiciatic.