O sector TIC galego prepárase para asistir a unha nova edición do seu foro de referencia, GaliciaTIC. Un evento organizado pola Asociación de Empresas de Tecnoloxía de Galicia (INEO) conxuntamente coa empresa INETEC, que este ano celebrará a súa XVI edición o vindeiro xoves 24 de maio no edificio CINC da Cidade da Cultura de Galicia.
GaliciaTIC abrirá as súas portas baixo o lema "Tecnoloxías, capacidades e infraestruturas que están a impulsar a transformación dixital", co fin de atraer non só aos profesionais deste ámbito, senón tamén aos dos demais sectores empresariais para mostrarlles o que as TIC poden facer polas súas empresas.
O evento ten varios obxectivos: por unha banda, analizar as tendencias actuais na transformación dixital e as oportunidades de negocio asociadas a elas para as TIC galegas; e doutra banda, sensibilizar ao resto de sectores sobre as vantaxes que leva (aforro de custos, mellora de produtividade, redución de tempos, etc).
Para iso, este foro estrutura os seus contidos en cinco tipos de actividades diferentes.
- Relatorios, masterclasses e mesas de debate
- Mesas temáticas
- Competicións de enxeñería
- Showrooms e demostracións
- Networking
GaliciaTIC promoverá o networking entre os asistentes mediante as pausas destinadas ao café, a comida e as zonas comúns.
A asistencia a GaliciaTIC é gratuíta pero é necesaria unha invitación que pode solicitarse aos organizadores e patrocinadores do evento. Na web www.galiciatic.com pódense consultar os mesmos, así como a totalidade do programa e as empresas participantes.
