O certame de creadores novos Xuventude Crea 2018 entrega os seus galardóns este martes 11 de decembro na Cidade da Cultura. A gala, que contará coa participación da conselleira de Política Social, Fabiola García, celebrarase no Salón de Convencións do Edificio CINC a partir das 18:00 horas.
Dirixido a mozos e mozas entre os 16 e os 30 anos, nesta edición prémianse un total de 13 especialidades creativas (teatro, artes plásticas, fotografía, música, relato breve, poesía, videocreación, banda deseñada, graffiti, moda, deseño de xoias, cociña e skate). Máis de 350 rapaces e rapazas participaron este ano no concurso, que se consolida ano a ano como a principal mostra da creatividade xuvenil en Galicia.
Xuventude Crea está impulsado pola Consellería de Política Social a través da Dirección Xeral de Xuventude Participacion e Voluntariado. O programa ten como obxectivo incrementar as posibilidades dos novos valores da arte galega, facilitándolles un espazo no que as mozas e mozos poden exercitar as súas habilidades, poñer en marcha os seus proxectos innovadores, impulsar a súa posible proxección e inserción profesional futura.
