A Cidade da Cultura acolle o FIT25, segunda edición do Curso de Formación Específica en Improvisación Teatral da Universidade de Santiago de Compostela, que decorrerá do 28 de xullo ao 30 de agosto de 2025 baixo a dirección de Antón Coucheiro (Escola Espontánea), Gala Martínez-Romero (Cómicas Anónimas) e Feña Ortalli (Global Impro).
O FIT é un curso intensivo deseñado para ofrecer unha preparación integral na disciplina escénica da improvisación teatral que inclúe formación teórica e práctica. A formación está composta por diferentes materias, divididas en cinco módulos: Catro módulos troncais (Impro, Dramaturxia, Interpretación, e Dirección); un módulo complementario e un último módulo de Montaxe Final. Ao longo das cinco semanas, o alumnado mergullarase nun proceso de aprendizaxe colectiva que culminará coa posta en escena de diferentes traballos, aplicando os coñecementos e ferramentas adquiridos durante o curso.
Cun total de máis de 140 horas de clases impartidas por docentes de renome internacional, o FIT é unha oportunidade única en Europa para profesionalizarse na disciplina da improvisación teatral.
Máis información na web do FIT25.
