O Edificio CINC da Cidade da Cultura acolle o 17 de decembro unha xornada divulgativa da economía azul no marco das estratexias e proxectos dos GALP (Grupos de Acción Local do sector Pesqueiro). A xornada, promovida pola Dirección Xeral de Desenvolvemento Pesqueiro da Consellería do Mar, está dirixida ao persoal técnico destas entidades e ás persoas integrantes das xuntas directivas.

A xornada artéllase arredor de dúas mesas redondas: «Os GALP motores da economía azul» e «Proxectos inspiradores no marco da economía azul nos territorios GALP», na que se darán a coñecer catro iniciativas desenvolvidas polos GALP do Golfo Ártabro Sur, da Ría de Arousa, da Ría de Pontevedra e da Ría de Vigo-A Guarda.