A Axencia Galega da Calidade Alimentaria (Agacal) organiza esta xornada para a presentación da Estratexia de dinamización económica, territorial e turística das comarcas vitivinícolas. Trátase dunha iniciativa conxunta do sector, a Xunta e a Fundación Juana de Vega, que conta cunha dotación de máis de 700.000 euros e procura achegar ferramentas para consolidar o crecemento da industria vitivinícola galega.
A estratexia pretenda aproveitar a complementariedade das diferentes comarcas vitivinícolas e propiciar un desenvolvemento socioeconómico do territorio que contribúa a mellorar a posición competitiva dos viños galegos no mercado nacional e internacional, identificándoos cun territorio que reforce a súa identidade, autenticidade e calidade para os consumidores. Esta folla de ruta debe servir tamén para mellorar a eficacia da promoción e comercialización en conxunto de produtos turísticos vinculados ao sector do viño galego.
A iniciativa complementarase coa Lei de recuperación de terra agraria, xa en vigor, que ten como obxectivo poñer en valor terreos abandonados ou infrautilizados.
