O Premio Nós tamén creamos! recoñece curtas de animación en galego elaboradas por alumnado de infantil e de primaria coa técnica stopmotion. As curtas son adaptacións de textos literarios; en concreto, de álbums ilustrados. O premio forma parte do programa de dinamización lingüística homónimo desenvolto pola Consellería de Cultura, Educación e Ordenación Universitaria en colaboración coa Corporación de Radio e Televisión de Galicia e con OQOeditora.
Nós tamén creamos! ten os obxectivos de promover unha imaxe positiva da lingua galega, favorecer o seu uso e aprendizaxe en novos ámbitos e formatos e dar a coñecer as opcións de ocio en galego que lles ofrece aos cativos o web da Televisión de Galicia.
As curtas premiadas este ano poden verse no Portal da Lingua Galega e no web da Televisión de Galicia
