O conselleiro de Cultura, Educación, FP e Universidades en funcións, Román Rodríguez participará no encontro do alumnado participante no programa 21 días co galego e + co gallo do Día da Lingua Materna, que ten lugar o 21 de febreiro de 2024 no edificio Fontán da Cidade da Cultura. 

Neste acto, de clausura desta edición do programa, participa alumnado dunha decena de centros de ensino de Galicia. 

21 días co galego e + é un programa impulsado pola Consellería de Cultura, Educación, Formación Profesional e Universidades a través da Secretaría Xeral de Política Lingüística. A súa finalidade é promover o uso do galego oral entre a xente nova. Este programa de dinamización lingüística nace para que a xente nova fale máis o galego e perfeccione o seu uso dentro e fóra das aulas. Alén diso, preténdese que a mocidade analice a súa relación coas linguas que coñece, e máis concretamente coa propia de Galicia, para ver cal é o lugar que ocupa ou pode ocupar na súa vida.

A singularidade de 21 días co galego e + reside na vontade de implicar por completo as rapazas e os rapaces, durante un tempo determinado, na procura de que o galego sexa a súa lingua normal de uso en todos os ámbitos, e no feito de levar a aula á rúa e a rúa á aula, fuxindo do estudo máis académico da lingua.