O consello territorial galego da Unión de Radioaficionados Españoles, en colaboración coas delegacións da URE en toda a comunidade organiza un evento especial na Cidade da Cultura con motivo do Día de Galicia.
O 25 de xullo, o Gaiás será a sede desde a que se activará unha estación singular de carácter internacional, coa nomenclatura AO2022XAC, que outorgará unha tarxeta QSL conmemorativa do Xacobeo 21-21. As tarxetas QSL son empregadas polos radioafeccionados como proba material da existencia dun contacto e son necesarias para a obtención de diplomas ou para gañar puntos en concursos. Ademais, instalaranse dous equipos para que o público poida ver como operan os radioafeccionados en directo.
O evento forma parte do 'Diploma Xacobeo 21-22 - 'Galicia para o mundo' un concurso aberto a todas as estacións de radioafeccionado con licencia en vigor que comezou o 18 de xullo coa intención de difundir o Camiño de Santiago a través das ondas e a nivel internacional. Durante este tempo, activáronse 10 estacións especiais en todas as bandas, cada unha delas representando unha das rutas xacobeas.
