A Cidade da Cultura de Galicia volve acoller unha nova edición do desfile Despunte. A Escola de Arte e Superior de Deseño Mestre Mateo presenta este xoves 28 de novembro no Gaiás os traballos do curso 2018-2019, unha ocasión para visibilizar o talento, o saber facer e as horas investidas nos Traballos Finais de Estudos (TFE) do seu alumnado de Deseño de Moda e Xoiaría.
A cita será ás 20 horas e nela a través do cento de deseños participantes poderán verse coleccións moi diferentes, dado que a temática dos TFE é totalmente libre. Nesta 11ª edición compartirán pasarela 16 coleccións coas que o público viaxará a distintos momentos históricos cuxa pegada se pode ver nos traballos presentados: desde as milicianas dos anos 30, a silueta dos anos 50, ou movementos como o Futurismo ou o Impresionismo, creando unha harmonía entre arte e moda, e tocando temas de fonda actualidade como a problemática medioambiental.
Os estudantes dos primeiros cursos colaboran tamén en Despunte asumindo funcións na organización do evento, a fotografía das coleccións e botando unha man entre bastidores durante o desfile.
