A Cidade da Cultura acolle os días 3 e 4 de outubro o Congreso Internacional Galaico-Lusitano de Historia da Medicina, un encontro multidisciplinar que se achega á evolución histórica do coidado, da saúde e da medicina dende a prehistoria ata a era contemporánea. O obxectivo deste congreso é promover o debate entre diversas disciplinas como a medicina, a historia, a antropoloxía e a arqueoloxía. Así como a contribuir á comprensión máis profunda da evolución da medicina na rexión luso-galaica e o seu impacto global.
O acto inaugural do congreso terá lugar o 2 de outubro no Pazo de Fonseca, mentres que as dúas xornadas seguintes (3 e 4 de outubro) se desenvolverán no Edificio Fontán da Cidade da Cultura. Neste encontro participarán académicos, investigadores e profesionais de distintas disciplinas e procedencias (non soamente de Galicia e Portugal).
