Baile de entroido no mundo do mar

 

O Museo Centro Gaiás, un edificio que precisamente a moitos visitantes lles lembra á silueta dunha balea, erixirase como escenario de excepción para o Baile deste ‘Entroido Mareiro’. Mariñeiros e mariñeiras, sereas e piratas, pescantinas e mariscadoras, peixes e tritóns, capitáns e sapoconchos… reuniranse este luns de entroido para unha festa digna do mesmísimo Poseidón!

O baile, ao que será obrigatorio acudir cun disfrace de temática marítima, está dirixido a públicos de todas as idades a partir dos 3 anos. Comezará ás 17:30 cunha sesión de música típica destas datas a cargo de Fixemberg DJ e continuará ás 18:30 co espectáculo de música ao vivo de Pablo Díaz e a banda Tic, Tac, Toc.