O servizo de voluntariado da Federación de Asociacións de Persoas Xordas de Galicia celebra este ano o seu 20º aniversario. En 2003 a FAPXG creou este servizo co obxectivo de fomentar a solidariedade coas persoas xordocegas e xordas en situación de exclusión, realizando actividades de lecer e tempo libre para evitar o seu illamento social e comunicativo. Desde 2018 desenvolve tamén actividades con persoas maiores xordas.
Este servizo recibiu varios premios e recoñecementos e actualmente conta co financiamento da Xunta de Galicia a través da Dirección Xeral de Xuventude, Participación e Voluntariado.
Para celebrar este aniversario, a FAPXG organiza un acto conmemorativo o día 2 de decembro de 2023 na Cidade da Cultura. Será un evento para homenaxear o traballo dos voluntarios e voluntarias durante todo este tempo, e tamén para coñecer as súas experiencias e as de persoas beneficiarias do servizo. A asistencia ao acto será con invitación.
