Percorrido polas zonas verdes do Monte Gaiás para descubrir dun xeito exprés das máis de 40 Ha de zonas verdes que rodean o complexo arquitectónico, coñecer a súa fauna e a súa flora e deternos nos principais aspectos medioambientais asociados a estes espazos naturais ou recuperados.
Saíndo do Museo Centro Gaiás, achegarémonos brevemente ao Xardín Literario para a continuación percorrer parte dos sendeiros do Bosque de Galicia, o gran pulmón verde do monte, con once mil árbores de especies autóctonas (carballos, castiñeiros, bidueiros, espiños, pradairos, abeleiras, érbedos, freixos, faias…), que incrementa a biodiversidade da zona e mellora o metabolismo ambiental de Santiago, ao tempo que contribúe a integrar a Cidade da Cultura en Compostela. Descubriremos tamén as zonas de lecer infantil do Bosque de Galicia e o Parque da Balea, e deterémonos a coñecer as obras de arte que albergan os espazos exteriores do Gaiás: con instalacións escultóricas como Espellos, de Manolo Paz, Zapatos no Camiño, de Francisco Leiro, ou Deixa aquí os medos, de Alicia Framis.
IMPORTANTE
- Percorrido suxeito a modificacións por cuestións organizativas.
- Deberán seguirse en todo momento as indicacións do persoal responsable da actividade.
- Cómpre ter en conta que o percorrido inclúe desprazamentos por pavimentos irregulares, escaleiras e pendentes na aba do monte, polo que non sería apto ou presentaría dificultades con cadeiras de rodas ou dificultades de mobilidade.
- Os/as menores que asistan á visita deberán estar sempre acompañados/as dunha persoa adulta responsable.
- Podes consultar aquí os diferentes modelos de visitas comentadas que ofertamos.
