A Guerra Civil en España obrigou ao exilio o artista e intelectual galeguista Daniel Rodríguez Castelao. A súa obra icónica A derradeira leición do mestre—enmarcada nesta época escura de represión fascista — é a peza protagonista da exposición que acolle o Museo Centro Gaiás, Castelao maxistral. A boa obra ao mestre honra. Por iso, o programa de actividades ao redor desta mostra —que está a ser visitada xa por preto de 25.000 persoas— obrigaba a celebrar un encontro con persoas que na actualidade —en condición de refuxiadas ou exiliadas— están a pasar unha situación similar á que viviu Castelao e moitas e moitos dos seus coetáneos.
Na nosa sociedade actual, a nivel global, estase a vivir unha complicada situación xeopolítica que se reflicte no número de vítimas de conflitos bélicos e políticos, especialmente visibles a través do número de persoas refuxiadas, exiliadas e/ou represaliadas.
Para darlle visibilidade a esta situación, e grazas á colaboración con Amnistía Internacional, a Cidade da Cultura incorpora nas súas actividades ao redor da exposición Castelao maxistral. A boa obra ao mestre este encontro con persoas refuxiadas e exiliadas que, neste intre, viven en Galicia.
O obxecto é que compartan a súa crúa experiencia, na que dean a coñecer a realidade dos seus países e zonas de orixe en conflito, á vez que procurar eses paralelismos co contexto sociopolítico de Castelao, pero sobre todo escoitar e empatizar coas súas inquedanzas e coas súas necesidades.
A mesa será moderada polo responsable de Relacións Institucionais de Amnistía Internacional de Vigo, Manuel Martínez Barreiro, e formarán parte da mesa:
- Juan Sosa Maldonado, persoa refuxiada proveniente de Oaxaca (México).
- Nour Al Hussen, persoa exiliada proveniente de Siria.
Ambos serán convidados especiais do concerto ofrecido pola Real Filharmonía de Galicia, Os camiños de Castelao, e que terá lugar ao rematar o encontro, no que a orquestra fará un percorrido polas cidades de diáspora e do exilio de Castelao.