A Cidade da Cultura de Galicia colabora un ano máis co WOS Festival e celebra dous días (o 12 e 13 de setembro, de 16.30 a 19.45 horas) de interesantes faladoiros co WOS Encontros:
12 de setembro:
- WOS 2018 | XERACIÓN DE NOVAS AUDIENCIAS NO ÁMBITO CULTURAL
- WOS 2018 | ENCONTRO CON PETER KEMBER (SONIC BOOM)
13 de setembro:
- WOS 2018 | DO COMPLEXO AO BELO: NOVOS MEDIOS E NARRATIVA DE DATOS
- WOS 2018 | INNOVACIÓN, SUSTENTABILIDADE E DESENVOLVEMENTO EN FESTIVAIS
WOS Festival x SON Estrella Galicia é un encontro de carácter anual que defende unha visión ampla da cultura de vangarda. Coa música como motor principal pero cunha decidida vocación multidisciplinar, o festival promove, a partir dun contexto íntimo, a procura e difusión de novas propostas artísticas e culturais desde o risco e a exploración. O programa, desenvolvido ao longo de cinco días, presenta concertos, arte sonora, cinema, performance, coloquios e charlas enmarcados en unha decena de espazos excepcionais e emblemáticos no corazón do centro urbano e histórico de Santiago de Compostela. En 2018 celebra a súa quinta edición.
Algúns dos nomes que pasaron por WOS inclúen a Raime, Roly Porter & MFO, Vessel, Silver Apples, Fluzo, The Soft Moon, Michael Rother plays Neu!, Robert Henke: Lumière III, Beak>, Demdike Stare, Greg Fox, Samuel Kerridge, Tolouse Low Trax, Julia Kent, Oren Ambarchi, Guy Marc Hinant, Nuria Sotelo, Javier Martín, K-X- P ou Lucrecia Dalt entre outros.
O festival é unha iniciativa da produtora compostelá WORK ON SUNDAY, en colaboración coa asociación de axentes culturais galegos WOS INC. Conta como patrocinador principal con SON Estrella Galicia, e co apoio do Concello de Santiago de Compostela, Deputación da Coruña, AGADIC – Xunta de Galicia, Cidade da Cultura de Galicia, Centro Galego de Arte Contemporánea (CGAC), Fundación Eugenio Granell, Universidade de Santiago de Compostela e Mercado de Abastos entre outras entidades.
