Atrévete a cruzar o maior océano do planeta sen saír do Museo Gaiás! No programa de visitas especiais Un océano de historias: navegando o Pacífico exploraremos as culturas de Oceanía a través dos seus relatos, dos seus símbolos e das súas tradicións.
Moais para lembrar os devanceiros, árbores que naceron de caveiras, roupas de guerreiros danzantes, redes de pesca tecidas con cabelo humano, armaduras de dentes de tiburón e fibra de coco... A través dalgunhas das pezas máis destacadas da exposición Voces do Pacífico. Innovación e tradición, estas visitas convídante a navegar de Rapa Nui a Papúa Nova Guinea para descubrir a extraordinaria diversidade das culturas oceánicas: onde cada peza agocha unha historia, e cada historia abre novas conexións culturais.
Gaiás inspira
Esta actividade encádrase na liña de programación Gaiás_Inspira, que abrangue diferentes accións divulgativas, lúdicas e didácticas ao redor das exposicións do Museo Centro Gaiás, dirixidas ben a público adulto, ben a infantil e xuvenil, con propostas innovadoras que converten as salas do Museo nun espazo vivo, aberto á participación do público e á aprendizaxe compartida.
Información a ter en conta
- A primeira quenda de visita desenvolverase o sábado 20 de xuño ás 12:00 e ás 17:00 horas. A partir dese día, as visitas prográmanse os sábados ás 17:00 e os domingos ás 12:00 horas
- De balde, previa reserva de praza nesta web
- Se as prazas están esgotadas, recomendamos consultar na véspera: de haber anulacións, as quendas dispoñibles publicaranse de xeito automático
- Se non vas poder asistir, lembra cancelar a túa reserva con suficiente tempo de antelación para que outras persoas poidan gozar de dita praza
- Os/as menores que asistan á visita deberán estar sempre acompañados/as dunha persoa adulta responsable.
- Deberán seguirse en todo momento as instruccións do persoal guía da visita.
- A exposición conta ademais cun programa de visitas regulares. Máis información e reserva de praza premendo AQUÍ.
- Tamén pode visitarse por libre, co apoio da nosa audioguía. Preme para escoitala no idioma correspondente: Audioguía GAL | Audioguía ES.
