Os camiños de Castelao. Real Filharmonía de Galicia

A Cidade da Cultura de Galicia continúa a despregar actividades ao redor a Castelao maxistral, a exposición que permite contemplar por vez primeira en Galicia a ‘A derradeira leición do mestre’, lendario cadro visitado xa por preto de 25.000 persoas. Este programa arrancará en 2019 cunha xornada dedicada ao exilio xa que foi nesta circunstancia cando o artista de Rianxo pintou o óleo que artella o relato da mostra. Deste xeito, o 17 de xaneiro, o Museo Centro Gaiás acolle un concerto da Real Filharmonía de Galicia (RFG) —cun repertorio centrado nos países que percorreu o intelectual galeguista— e un encontro con persoas refuxiadas e exiliadas en Galicia, en colaboración con Aministía Internacional, cuxas entrada é de balde, previa inscrición na nosa páxina web.

Este recital da RFG leva por título Os camiños de Castelao e baséase nunha unha escolma de temas representativos dos diferentes países que marcaron a vida de Castelao, realizada ‘ex profeso’ polo director titular e artístico da formación, Paul Daniel. Deste xeito, e a través do repertorio escollido, os e as asistentes farán no Museo Gaiás un percorrido vital do periplo do artista galego desde Rusia, Cuba, os Estados Unidos de América e ata o exilio definitivo en Buenos Aires, a través de pezas de E. W. Korngold, Stravinsky ou Piazzolla, entre outros compositores.

Esta actuación especial —para a que xa están as entradas á venda en Ataquilla.com e no Museo Centro Gaiás— inxírese dentro do programa de actividades coas que se está a dinamizar a exposición Castelao maxistral. A boa  obra ao mestre honra, que desde a súa inauguración, o pasado 5 de outubro, xa celebrou visitas-relatorio con especialistas na súa obra e figura —con todas as prazas cubertas— e un recital coa Coral Polifónica de Pontevedra, da que Castelao foi cantor, fundador (1925) e escenógrafo, traendo para a ocasión un pano ornamentando polo propio artista, que contadas ocasións sae do Museo de Pontevedra que o custodia.

Pór o foco no exilio para as actividades de xaneiro ten un vencello especial coa mostra, xa que A derradeira leición do mestre, homenaxe do artista de Rianxo ao seu amigo e intelectual asasinado, Alexandre Bóveda, foi pintado nestas circunstancias en Buenos Aires en 1945. Castelao asentouse na capital da Arxentina, tras un periplo por diferentes países que son os que determinan o programa do concerto escollido persoalmente polo propio Paul Daniel.

Así, en 1938, o intelectual galego realizou unha viaxe á extinguida URSS e, máis tarde, aos Estados Unidos de América e tamén a Cuba. Durante a súa presenza na illa caribeña, Castelao participou activamente nas eleccións do Centro Galego da Habana. A derrota republicana condenouno ao exilio, asentándose en Nova York, primeiro, onde publicou o álbum Milicianos e, posterior e definitivamente, en Buenos Aires (A Arxentina), onde chegou a estrear a súa peza teatral Os vellos non deben namorase.

  • Paul Daniel, director
  • Grigori Nedobora, violín
  • James Dahlgren, concertino


PROGRAMA.

  •  I.

- E. W. Korngold: Much Ado About Nothing, op. 11 (suite) 

- M. Quiroga:
Alborada (Orquestración Paul Daniel)
Danza arxentina (Orquestración Paul Daniel) 
Emigrantes celtas (Orquestración Paul Daniel)
Himno

- D. Milhaud: Le creation du monde, op. 81

 

  • II.

- I. Stravinsky: Suite Pulcinella (rev 1949)

- A. Piazzolla: Libertango tango