Descobre unha nova forma de achegarse ao Gaiás e de descubrir a propia cidade de Compostela. Organizada en colaboración coa Fundación USC Deportiva, Camiño ao Gaiás ofrécelle aos visitantes novas rutas para chegar a pé ao complexo deseñado por Peter Eisenman, poñendo en valor a fermosa contorna natural e patrimonial que leva ata a Cidade da Cultura, permitindo descubrir algunhas das xoias arquitectónicas de Compostela como a praza de Cervantes, a Igrexa das ánimas, o convento de Bonaval e de Belvís, o Centro de Interpretación ambiental de Compostela ou a Colexiata do Sar.
Acompañados por monitores da Fundación USC Deportiva, os participantes concentraranse no centro histórico de Santiago e subirán a pé ata a Cidade da Cultura. Unha vez alí, serán recibidos por un dos guías da Fundación Cidade da Cultura de Galicia, e completarán o seu percorrido cunha visita guiada á exposición Orinoco. Viaxe a un mundo perdido e ao propio complexo deseñado por Peter Eisenman.