Desde o inicio da súa carreira, Umeda, fotógrafo convertido en coreógrafo, aspirou a “presentar pezas de danza como arte gráfica bidimensional”. En While going to a condition, o artista coloca no fondo do escenario un lenzo electrónico de luz que pestanexa a unha velocidade vertixinosa. Xeométrica e monocromática, esta imaxe altamente abstracta está deseñada para ser percibida pola visión periférica. Sincronizando por momentos con son de tambores xerado dixitalmente, lémbranos os sons primordiais e catívanos cos movementos frenéticos e líricos do bailarín situado no centro do escenario.
Umeda parte do movemento máis xeral —estar de pé— e logo vai gañando impulso gradualmente ata, nun momento dado, transcender o estado físico ordinario para alcanzar un aura física extraordinaria. Do ordinario ao extraordinario, e logo de volta ao ordinario. O público experimentará unha transformación incesante de distintas formas de estados físicos.
Hiroaki Umeda
Coreógrafo e bailarín, Hiroaki Umeda é unha das principais figuras da escena artística de vangarda xaponesa. Desde o lanzamento da súa compañía S20, as súas pezas de danza sutís pero violentas viaxaron por todo o mundo con gran éxito de crítica. Umeda é coñecido pola súa metodoloxía artística altamente holística con forte bagaxe dixital, que considera non só elementos físicos como a danza, senón tamén compoñentes ópticos, sensoriais e, sobre todo, espazo-temporais como parte da coreografía.
Baseado no seu profundo interese pola coreografía do tempo e do espazo, Umeda difundiu o seu talento non só como coreógrafo e bailarín, senón tamén como compositor, deseñador de iluminación, escenógrafo e artista visual.
SINTE. Foro internacional de arte e cultura dixital
Función incluída dentro da programación de SINTE, espazo de pensamento e diálogo ao redor da creación dixital contemporánea, os seus retos e oportunidades. O 20 e 21 de novembro, a primeira edición deste Foro Internacional de Arte e Cultura Dixital reúne en Santiago de Compostela algunhas das voces máis recoñecidas do momento neste ámbito.
Artistas, estudios, especialistas en xestión cultural e representantes dalgúns dos espazos de exhibición máis dinámicos e innovadores achegarán no Gaiás a súa visión sobre o presente e o futuro da arte e das industrias creativas nun contexto onde as transformacións tecnolóxicas están a exercer unha presión inusitada sobre o campo cultural, os consensos das últimas décadas semellan esgotarse, e onde emerxe unha nova arte dixitalizada e, con ela, novos coñecementos e novos interrogantes.
