Ponnos verde! Planta unha árbore no Bosque de Galicia

Convidámosvos de novo a que nos poñades verde, dun xeito que presta tanto como é o de vir plantar árbores autóctonas ao Bosque de Galicia.

A Cidade da Cultura de Galicia volve pedir a vosa colaboración simbólica na construción do Bosque de Galicia, nesta segunda etapa recentemente iniciada, plantando unha árbore no Gaiás, a través da Fundación Cidade da Cultura, co apoio da Fundación USC Deportiva e o patrocinio de Viaqua.

Deste xeito, ben sexa por iniciativa individual ou en grupo poderedes acudir os sábados pola mañá e contribuír a encher de vida as ladeiras do monte Gaiás.

Dúas quendas por día

En cada xornada organizaranse dous grupos de 25 persoas: a primeira quenda ás 10 e a segunda ás 12 horas e ademais de plantar unha árbore, os participantes faredes un percorrido polo Bosque de Galicia, coñeceredes de primeira man o proxecto e levaredes para casa unha fotografía e un diploma que recorde e acredite, respectivamente, a vosa contribución a este espazo verde. A actividade é de balde mais é preciso inscribirse previamente en www.fundacionuscdeportiva.org.

A participación cidadá é un xesto simbólico co que procuramos, de novo, implicarvos na área verde que supón o Bosque de Galicia para Santiago de Compostela.

Segunda fase do Bosque de Galicia

A Xunta de Galicia puxo en marcha en agosto os traballos da II Fase do Bosque de Galicia, un proxecto que suporá a ampliación en dez hectáreas e 4500 árbores de especies autóctonas da superficie verde que se está a plantar nas ladeiras do Gaiás, ao redor da Cidade da Cultura.

Estes novos traballos, que están sendo realizados polos técnicos da empresa pública Seaga, afectan á ladeira suroeste do monte. Cando se rematen, o Bosque de Galicia contará cunha superficie total de 34 hectáreas e preto de 12.000 árbores novas, que se suman ás existentes antes de iniciarse o proxecto. O resultado será unha ampla alfombra verde destinada ao ocio ao aire libre de todos os galegos e un pulmón ecolóxico cun impacto positivo sobre o metabolismo medioambiental de Santiago.

A segunda fase prevé tamén a construción de dous novos quilómetros de sendas, que se suman aos 3,2 construídos. Deste xeito, o bosque contará con cinco quilómetros de sendas cun sistema de iluminación de baixo consumo que permitirá o seu uso en horario de pouca luz natural. Ademais, haberá áreas de descanso e unha terraza con vistas sobre Santiago.

As novas sendas facilitarán o acceso peonil desde o Sar ate a Cidade da Cultura, desembocando no entorno do museo, do Xardín Literario e das Torres Hejduk. Acurtarase, polo tanto, o tempo daqueles que desexen achegarse a pé. O proxecto inclúe tamén o que será o acceso principal ao Bosque de Galicia a través da rúa Diego Bernal.

 
En familia
 
Todos os venres do 29 de xuño ao 17 de agosto
Dese as 19h ata as 12h do día seguinte
Todos os xoves do verán | Do 5 de xullo ao 13 de setembro
19h | 22.30h
11 Xullo
De 12 a 13.30 horas
25 Agosto
De 16 a 20 horas