A Cidade da Cultura de Galicia convida a todos os cidadáns a descubrir a través de roteiros guiados gratuítos o Bosque de Galicia, a nova área verde de Compostela no monte Gaiás, así como o Parque da Balea e o Xardín Literario, espazos de lecer nos exteriores do Gaiás.

A partir do vindeiro 10 de maio, e todos os días de martes a domingo deste mes, a Cidade da Cultura ofrece a posibilidade de participar nunha visita guiada na que percorrer as ladeiras do Gaiás a través da rede de sendas creadas para gozar desta nova área de lecer. Partindo dun dos accesos existentes na Avenida Diego Bernal, os participantes descubrirán estas novas 24 hectáreas repoboadas con especies autóctonas que incrementan a biodiversidade da zona e da propia cidade de Santiago.

Con zonas para o descanso dispostas no percorrido e un fermoso mirador no alto, os cidadáns non só poderán gozar deste espazo verde, senón que descubrirán a cara máis descoñecida de Compostela. Guiados polo persoal da Cidade da Cultura, os participantes nestes roteiros coñecerán tamén unha das novas áreas de lecer do Gaiás: o denominado Parque da Balea, unha área de xogo e descanso que homenaxea a un dos grandes artistas plásticos galegos: Urbano Lugrís. A visita guiada concluirá no corazón do Gaiás, cun achegamento ao Xardín Literario, espazo verde dedicado aos escritores e poetas galegos.

A partir do 10 de maio

As visitas guiadas ao Bosque de Galicia terán lugar de martes a domingo durante todo este mes de maio a partir do vindeiro martes, día 10. O punto de encontro será a entrada do Multiusos Fontes do Sar (Avenida Diego Bernal) e a actividade comezará ás 17 horas. Cunha duración aproximada de 60 minutos, as visitas guiadas son de balde, mais é preciso inscribirse previamente en cidadedacultura.gal.