Gústanche os experimentos? Soñaches algunha vez con ser científico? No Día dos Museos, o Gaiás convértese nun laboratorio no que poder presenciar e realizar experimentos cos que poñer en valor as cualidades e propiedades dos elementos que podes atopar no Camiño: desde tesouros a reliquias, fósiles ou as especies arbóreas que enriquecen a ruta.

O Laboratorio Gaiás conta cun circuito experimental que primeiro nos descubrirá como a materia está composta de átomos, monómeros e polímeros moi especiais que construiremos… e comeremos. Ademais, poderemos descubrir os Tesouros do Camiño, comprobando en vivo que cambios sofren os metais co paso do tempo ou a importancia das reliquias e fósiles para comprender a historia e a evolución. Ademais, Laboratorio Gaiás ensinará as 1.527 especies arbóreas que poboan o Camiño, aprendendo a distinguilas, a respectalas e a entender os perigos que sofren.