Programa da sesión

Marta Ríos, actriz

María Lado, poeta e actriz

Marta Ríos e María Lado dinamizarán e interpretarán esta aventura na que, como en todas as edicións de Ceo das Letras Infantil, a aprendizaxe e a diversión serán a mesma cousa.

Resolve pequenos misterios sobre a vida e a obra de Ramón Otero Pedrayo a  través de xogos cos textos, actividades colectivas e pequenas lecturas, contando sempre coa axuda dun elenco de personaxes que os guiarán na súa investigación como se fose a procura dun tesouro.

A actividade desenvólvese nun percorrido que transcorre pola Biblioteca da Cidade da Cultura, onde os nenos van atopando actividades lúdicas do máis diverso que os achegarán ao escritor e á súa obra. Ademais, os nenos pintarán a Otero Pedrayo, escoitarán música, disfrazaranse, e moitas actividades máis.

O Autor: Otero Pedrayo

Ourense, 1888 – 1976

O gran patriarca das letras galegas foi un escritor prolífico, tanto na esfera literaria como no ámbito do ensaio.

Figura central do galeguismo cultural e político, posuidor dunha cultura enciclopédica e fondo coñecedor da sociedade rural galega da época, na súa obra agroman todos estes elementos enlazados por un verbo exuberante e evocador.

De entre a súa produción literaria destaca Arredor de si, ademais de Os camiños da vida, O mesón dos ermos, e O señorito da Reboraina.