Verán no Gaiás | Cidade Imaxinaria 2019

Xa está aquí o festival Cidade Imaxinaria e fabulosas personaxes volven encher de maxia a Cidade da Cultura! Viaxa connosco a mundos incribles nunha tarde de sábado chea de fantasía, circo, teatro, música e xogos ao aire libre, de balde e para toda a familia.

Visita o incrible circo de bechos xigantes do dr. Mezzo, convértete nunha marioneta controlada por dedos mecánicos, abráiate con cambadelas e acrobacias que quitan o alento, emociónate con máxicas historias e palabras das que chegan ao corazón...

Agardámoste con catro horas ininterrompidas de diversión para unha tarde de verán que remataremos bailando contigo nunha espectacular coreografía grupal na que todo o público está convidado a participar!

Por suposto non faltarán os xa tradicionais xogos de enxeño e Escola de Saltimbanquis da Cidade Imaxinaria, ademais dun espazo pensado para bebés de 0 a 3 anos, con xogos e estímulos sensoriais. Contaremos tamén cunha animada zona de descanso con postos de bebidas e petiscos variados, doces e salgados, onde repor forzas entre tanta festa rachada.

Lembra! O sábado 24 de agosto ven abraiarte no mundo de fantasía da Cidade Imaxinaria, onde os soños se converten en realidade cunha viravolta e o imposible non existe.

Espectáculos de pista

Espectáculos itinerantes

Espazos lúdicos para imaxinar

  • Escola de Saltimbanquis | Pistacatro
  • Titeretú | Itinerània
  • Xogos de circo e feira | Animatium
  • L'animalada | Katakrak
  • O Bosque dos sentidos | Risotadas
  • Obradoiros de baile para participar no baile final da Cidade Imaxinaria

Ilustración Cidade Imaxinaria do Verán 2019: Sr.Reny

 
En familia