Cidade Rompetiño 2019

O teu é a cultura urbanaTes unha cita a non perder o sábado 25 de maio na Cidade da Cultura de Galicia. Celebramos Cidade Rompetiño, unha xornada de oito horas con música e deportes de acción na Praza Central e no Xardín do Teatro do Gaiás.

Cidade Rompetiño dá resposta a un alto interese de xente nova que vincula o seu lecer a actividades deportivas —como parkour ou skate— e estreitamente ligadas á música de estilos hip-hop ou hall-dance. Precisamente, este evento acollerá a final do primeiro ‘Campionato oficial de España de Scooter Freestyle’, co que os e as participantes se clasifican para a proba mundial, prevista para o mes de xullo en Barcelona.

A Cidade da Cultura de Galicia organiza este encontro xunto a Rompiente Clothing e conta coa colaboración da Real Federación Española de Patinaje. Estes promotores realizaron por vez primeira en Porto do Son, o pasado ano, un festival de cultura urbana de similares características a Cidade Rompetiño durante tres días, coa asistencia de 15.000 persoas. Un éxito que os leva a repetir este mesmo ano no mes de xullo nesa vila do Barbanza, á vez que a organizar este encontro en Santiago de Compostela para arroupar a celebración no complexo do Gaiás da primeira final do ‘Campionato oficial de España de Scooter Freestyle’.

O recentemente inaugurado Xardín do Teatro será o escenario de moitas das actividades de Cidade Rompetiño. Este novo espazo verde, de 11.574 metros cadrados, conta con especies botánicas procedentes de diferentes partes do mundo, un auditorio ao aire libre, estanques, instalacións para practicar deportes urbanos e áreas de lecer para gozar da natureza.

Deste xeito, trátase da zona do Gaiás máis axeitada para festexar un evento como Cidade Rompetiño. En concreto, o Xardín do Teatro acollerá ao longo da xornada do sábado 25 de maio o ‘Campionato breakdance’ coa participación de figuras galegas neste estilo de baile urbano e tamén será o escenario escollido para a exhibición de deportes como parkour, skate e Bmx.

De igual forma, realizaranse ao longo de todo o día un ‘Rompetiño Parkour’, ideado para os afeccionados e afeccionadas con exhibicións e un parkour de obstáculos, cuxo enxeño e técnica supón sempre un abraiante espectáculo visual. Completarán a xornada actuacións de música ao vivo e un servizo de restauración, con foodtrucks.

Finalmente, e fóra do Gaiás, a Cidade Rompetiño porá punto e final á xornada competitiva e de demostracións deportivas na Sala Malatesta, no centro de Compostela, cunha ‘Batalla de galos’ entre os rapeiros Lopes, Fusa Nocta e Erin DJ Set.

FINAL CAMPIONATO OFICIAL DE ESPAÑA DE SCOOTER FREESTYLE !

A historia do Scooter Freestyle empeza nos Estados Unidos de América no ano 2000 coa comercialización de patinetes de pregar. Rapidamente, comezaron a modificarse estes patinetes para poder ser empregados nos skateparks. A día de hoxe, é a modalidade de deporte de acción con maior forza dentro do sector. Tras 16 anos da súa creación, esta actividade evidencia unha grande evolución que se asocia a actividades como o skate ou o Bmx. En 2015, celebrouse a ‘ISA World Final’, onde asistiron máis de 30.000 persoas no evento ‘LKXA Extreme Barcelona’ no recinto do Fórum, o que dá unha dimensión do enorme interese que esperta esta actividade urbana.

Cidade Rompetiño supón que Galicia sexa anfitrioa, por vez primeira, dun evento destas características e que implica, á vez, ter a oportunidade de acoller a primeira final do Campionato Nacional de carácter oficial, que se celebrará ao aire libre na Praza Central da Cidade da Cultura e no que participarán medio cento de mozos e mozas de toda España. Trátase, por tanto, dunha proba moi importante e de gran relevancia neste deporte urbano.

PROGRAMA: MÚSICA, PARKOUR, BREAKDANCE
E ZONA DE RESTAURACIÓN | DE 10 A 20 HORAS

  • FINAL DO CAMPIONATO DE ESPAÑA DE SCOOTER FREESTYLE

Este ano darase entrada a esta disciplina que se celebra de xeito oficial por vez primeira na capital de Galicia. Polo tanto, trátase dunha estrea pola porta grande para este deporte en Galicia. Nesta competición participan medio cento de persoas.

De 10:00 a 20:00 HORAS no skatepark Rompetiño instalado na Praza Exterior da Cidade da Cultura. As modalidades que terán lugar serán: Akademy (aberto a amateurs), Junior, Open
Feminino e Open Masculino

  • BREAK DANCE | CAMPIONATO BREAKDANCE : BREAKIN´ THE BEAT 2 vs 2

De 12:00 a 16:00. Pista aberta.
De 16:00 a 17:00. Confirmacións
De 17:00 a 18:00. Filtros
De 18:00 a 20:00. Eliminatorias.

Danza urbana con pista de baile no Xardín do Teatro para a participación de destacados artistas galegos

  • ROMPETIÑO PARKOUR | 16:00 a 20:00 horas

Park de obstáculos para afeccionados e afeccionadas con exhibicións que darán moito espectáculo..

  • EXHIBICIÓNS

Exhibición de Parkour, Skate, Bmx no Xardín do teatro.