A biblioteca galáctica contra a IA fantástica | Espectáculo familiar de Tanxarina Títeres

A biblioteca galáctica contra a IA fantástica é un espectáculo de teatro infantil, monicreques e música. Unha disparatada comedia de aventuras protagonizada por algúns dos personaxes máis senlleiros da literatura infantil galega.

O rato que coida da Biblioteca Galáctica descobre que unha ameaza axexa nos seus andeis... Nunha loita contra o reloxo, o rato bibliotecario Ataúlfo, Ramón Lamote e Sara deberán loitar contra o malvado profesor Smith e a súa IA fantástica para liberar os seus amigos Toribio, Espantallo Amigo e Lobo Namorado da súa maléfica influencia.

A adaptación teatral da novela de Carlos Labraña é un canto á amizade, á solidariedade e unha defensa dos libros, da lectura e da palabra escrita fronte a unha Intelixencia Artificial que quere acabar coa imaxinación e a fantasía.

Tanxarina títeres e Carlos Labraña

Tanxarina Títeres, premio da Crítica 2024, é unha compañía de teatro de monicreques galega, con máis de corenta anos de traxectoria artística. Contan con seis premios de teatro María Casares e participaron en festivais por Europa e América con grande éxito de público e crítica.

Carlos Labraña é un dos escritores máis premiados da literatura dramática infantil en lingua galega, entre os máis recentes o Manuel María de literatura dramática infantil en 2024, Barriga Verde de textos para teatro de títeres, ou O Facho de teatro infantil en 2025.

Nesta peza, ambos unen as súas forzas para celebrar o 75 aniversario da editorial Galaxia.