Carolina Cruz Guimarey formula unha proposta poética que vai máis aló do téxtil ou a moda como artefacto social, cun obradoiro onde os elementos naturais funcionan como segunda pel. Así, os participantes poderán experimentar con follas, terra, rama, pedras, plumas, espiñas… colocándoas directamente sobre a pel para crear imaxes poéticas e máxicas que darán como resultado final as fotografías que se exporán como resultado da actividade.

Carolina Cruz Guimarey (A Coruña, 1981). Licenciada en Publicidade pola Universidade de Vigo, realiza un máster de Produción artística Contemporánea na Universidade Politécnica de Valencia en 2010. No seu traballo atopamos un diálogo entre fotografía, performance e instalación. A súa práctica artística aborda o vínculo entre o corpo e a natureza, como evolución poética sobre a identidade. Pero, sobre todo, o seu traballo fálanos da nosa vulnerabilidade e dunha utopía da serenidade e o silencio.