Con motivo da exposición Camiño. A Orixe, o Museo Centro Gaiás ofrece a oportunidade de adentrase na organización dunha exposición temporal, analizando as diferentes fases e técnicas de traballo deste proceso, desde a concepción da idea ata a inauguración.

Con 150 obras procedentes de 70 institucións nacionais e internacionais, Camiño. A Orixe constitúe un caso de estudo axeitado para analizar aspectos como a definición do concepto e discurso dunha exposición, a selección e petición de obra, as relacións coas institucións cedentes, o deseño da montaxe, o seguro e transporte das pezas ou a edición do catálogo.

As xornadas analizarán tamén as relacións entre arte e historia,  coa presenza de prestixiosos investigadores e especialistas na cultura xacobea, e abordarán a dimensión emocional do Camiño, así como a ollada a este itinerario desde a creación contemporánea.

Persoas relacionadas coa dirección de museos, comisarios, técnicos de exposición, conservadores de obra, responsables de colección, arquitectos, historiadores e investigadores, todos ofrecerán aos participantes unha visión integral  da organización dunha exposición.

Consulta o programa na área de descargas.