Retransmisión en streaming de #CulturaLike

Santiago de Compostela, 22 de Noviembre de 2019

A Xunta de Galicia retransmitirá mañá sábado en streaming a xornada #CulturaLike, un encontro que reunirá no Gaiás dous divulgadores culturais que están a triunfar nas redes sociais cos seus contidos: Jaime Altozano, con máis de dous millóns de seguidores, e o galego Miguel Ángel Cajigal, máis coñecido como ‘El Barroquista’, con máis de 40.000 só na canle de Twitter.

Esta xornada esgotou en dúas horas a súas 50 prazas e provocou unha listaxe de garda dunha cifra semellante, polo que se decidiu emitila en liña polas redes sociais da Cidade da Cultura, a partir das 11 horas, cando comeza xusto o encontro. No mesmo amosarase como os contidos culturais tamén espertan o interese dunha audiencia de masas e tamén son capaces de converterse en trending topic nas redes sociais.

De igual forma, o encontro busca demostrar como estas ferramentas en liña poden servir de aliadas perfectas para difundir a arte fóra dos espazos museísticos, rachando coas canles de acceso tradicionais e permitindo espallar, e democratizar sen lindes físicos ou académicos contidos e coñecementos culturais.

Jaime Altozano e 'El Barroquista'

Deste xeito, no encontro estará un dos máis destacados divulgadores culturais en lingua hispana en Internet, Jaime Altozano (Madrid, 1993). Conta con máis de dous millóns de seguidores nas diferentes redes sociais e rexistra a vertixinosa cifra de máis de cen millóns de visualizacións acumuladas na súa canle de Youtube. Compositor e produtor musical, ten colaborado como creador de contidos divulgativos con institucións como a Universidade Politécnica de Madrid ou Teatro Real e con medios como Movistar+, Cadena SER e Radio Televisión Española (RTVE).

En Galicia tamén hai influencers culturais cunha forte pegada e seguimento en Twitter, como é o caso de Miguel Ángel Cajigal, máis coñecido por ‘El Barroquista’. A conta de Twitter deste licenciado en Historia da Arte e diplomado en Estudos Avanzados da Música pola  Universidade de Santiago de Compostela (USC) rexistra máis de 40.000 seguidores. Director do Máster de Educación en Museos y Espacios Culturales da Universidad Miguel de Cervantes (Valladolid) tamén colabora como divulgador cultural no programa Galicia por Diante da Radio Galega e forma parte do Servizo de Educación, Mediación e Atención ao visitante da Cidade da Cultura.

Da man destes dous destacados creadores de contidos culturais nas redes sociais, os e as participantes en #CulturaLike terán a oportunidade de coñecer as chaves dos novos relatos da cultura en Internet; a potencialidade da súa difusión en liña; e as importancia do seu deseño para facilitar a súa comprensión e acadar un maior impacto.

Caso práctico: Galicia, un relato no mundo

Todos e todas as participantes traballarán tamén cun caso práctico, os contidos de Galicia, un relato no mundo, a primeira das tres grandes exposicións que a Xunta de Galicia realiza no Museo Gaiás da Cidade da Cultura dentro da programación do Xacobeo’21.

Deste xeito, deberán realizar as súas propias achegas divulgativas ao redor desta mostra, que exhibe por primeira vez en Galicia destacada pezas de alto valor simbólico para a historia e cultura do noso país e que se atopan en prestixiosas institucións museísticas en diferentes recunchos do planeta.

Ti tamén podes facer #CulturaLike

 

Precisamente, convidaráselles ás persoas que se inscriban en #CulturaLike a participar na proba práctica Ti tamén podes facer #CulturaLike, na que poderán amosar os coñecementos adquiridos e as súas habilidades na construción de contidos e relatos en liña con esta grande exposición do Museo Centro Gaiás e nunha destas catro redes sociais: Twitter, Instagram, Facebook ou Youtube.

A publicación en cada unha destas canles da persoa que máis interaccións reciba ata o 31 de decembro recibirá como agasallo unha visita privada para el e para un/unha acompañante con El Barroquista, quen lles ensinará a catedral de Santiago. Esta experiencia suporalles a descuberta dun xeito diferente desta obra mestra da arte románica mundialmente recoñecida e de espazos que, de seguro, nunca antes se tiñan fixado co detemento e ollada deste especialista. A visita comentada incluirá o Arquivo da catedral e o soberbio Pórtico da Gloria, recentemente restaurado para recuperarlle a súa policromía orixinal.