Con esta nova edición das súas xornadas anuais, a Asociación Galega de Asperger (ASPERGA) proponse incrementar a participación das persoas con diagnóstico do Espectro do Autismo en actividades formativas de visibilización, concienciación e reivindicación. Son persoas dentro do espectro as que, como expertos pertencentes a diferentes ámbitos, presentan as ponencias das xornadas nas que, baseándose na súa propia experiencia real, axudan a comprender as características e necesidades do colectivo.
ASPERGA (Asociación Galega de Asperger), é unha entidade de Utilidade Pública que nace en xaneiro de 2006 co obxectivo principal de loitar pola inclusión das persoas con síndrome de Asperger, traballando con eles para que tomen o control das súas propias vidas e o futuro do seu colectivo.